टाइम्स संवाददाता
काठमाडौं, फागुन २५ । सरकारले व्यवस्थापिका संसदमा दुईजना मन्त्रीको उपस्थिति अनिवार्य गरेको छ । संसद्को विशेष र शून्य समयमा सभासद्हरूले ध्यानाकर्षण गराएका कुरा सुन्न मन्त्री उपस्थित हुनैपर्ने व्यवस्था छ । तर एकजना पनि मन्त्री उपस्थित नभएका कारण संसद् बैठक नै स्थगित हुने अवस्था आएको भन्दै आलोचना भएपछि संसद् बैठक बसेको समयमा कम्तिमा दुईजना मन्त्री अनिवार्य उपस्थित हुने व्यवस्था मिलाइएको हो ।
यसअघि सरकारले एकजना मात्र मन्त्रीको उपस्थिति अनिवार्य गरेको थियो । बुधबारको मन्त्रिपरिषद् बैठकले दुई मन्त्री अनिवार्य उपस्थित हुने व्यवस्था गर्न संसदीय व्यवस्था मन्त्रालयलाई जिम्मेवारी दिने निर्णय गरेको छ ।
त्यसैगरी सरकारले कामको सिलसिलामा लिबिया पुगेका सबै नेपाली कामदारको उद्धारका लागि हरसम्भव प्रयास गर्ने निर्णय गरेको छ । लिबियामा एकजना मात्र बाँकी रहँदासमेत उच्च महत्वका साथ उद्दार गर्ने निर्णय गरेको सरकारका प्रवक्ता एवं शिक्षामन्त्री गंगालाल तुलाधरले जानकारी दिए ।
लिबियामा कार्यरत एक हजार ५ सय ६२ जनालाई उद्धार गरिएको र बाँकी रहेका ७३ जनालाई सकुशल उद्धारका लागि अधिकतम प्रयास गर्ने निर्णय सरकारले गरेको छ । लिबियास्थित कोरियाली र चिनियाँ कम्पनीको सहयोगमा धेरै नेपालीको उद्धार भए पनि अझै केही नेपाली आन्दोलनबाट प्रभावित क्षेत्रमा रहेको समाचारहरू आइरहेका छन् । सरकारले बाँकी कामदारको उद्धारका लागि परराष्ट्र मन्त्रालयका सहसचिवको संयोजकत्वमा अन्तरनिकाय समन्वय समिति गठन गरेको छ । मन्त्रिपरिषद् बैठकले जापान सरकारले उपलब्ध गराउने भनिएको झण्डै ८७ करोडबराबरको खाद्य सहयोग स्वीकृत गर्ने निर्णयसमेत गरेको छ ।