त्रिशूली, फागुन १९ । अज्ञात समूहले बुधबार राति नुवाकोट जिल्लाको भद्रुटार गाविसमा एकै परिवारका तीनजनाको हत्या गरेको छ ।
भद्रुटार गाविस–३ नेवारपानीका एकै परिवारका ६५ वर्षीय विष्णुप्रसाद थपलिया, ६४ वर्षीया श्रीमती भैरवी थपलिया र उनीहरूका ४० वर्षीय छोरा श्याम थपलियाको हत्या गरेको हो ।
घरभित्र छरिएर रहेका तीनवटा शवमध्ये छोराका शव मूलढोका र बाँकी दुईको शव भान्छा र मझेरीमा पाइएका थिए । गाउँको सम्पन्न परिवारको रूपमा रहेका विष्णुप्रसाद थपलियाको तीन छोरामध्ये माइला मधुसुदन थपलिया जापान र कान्छा गोपीकृष्ण थपलिया कामदारका रूपमा कोरिया पुगेका छन् ।
विष्णुप्रसादका दुई बुहारी र दुई नातिनातिना राजधानी बस्दै आएका छन् । बिहान अबेर मात्र छिमेकीहरूले हत्या भएको थाहा पाएपछि प्रहरीलाई खबर गरेका थिए । अबेरमात्र घटनास्थल पुगेको प्रहरीले घटनाबारे अनुसन्धान गरिरहेको छ । (रासस)