टाइम्स संवाददाता
काठमाडौं, फागुन २० । वरिष्ठ साहित्यकार डायमण्ड शमशेर राणाको ९३ वर्षको उमेरमा शुक्रबार साँझ निधन भएको छ । लामो समयदेखि मृगौलासम्बन्धी रोगबाट पीडित साहित्यकार राणाको दुवै मृगौलाले काम गर्न छाडेपछि केही समययता थलिएका थिए ।
नेपालको ऐतिहासिक र सामाजिक पृष्ठभूमिमा आधारित रहेर उपन्यास लेख्न माहिर मानिने राणाको राजधानीको थापाथलीस्थित नर्भिक अस्पतालमा उपचारको क्रममा निधन भएको हो । रगतमा हेमोग्लोबिनको मात्राको कमी भएपछि राणालाई गत मंगलबार अस्पतालमा भर्ना गरिएको थियो । लामोसमय यता राणा अनुहार सुनिने, उच्च रक्तचाप र घुँडा दुख्नेलगायतका समस्याबाट पीडित थिए ।
राणा ऐतिहासिक उपन्यासहरू सेतो बाघ, वसन्ती, अनिता, सत्प्रयासलगायतका कृतिका रचनाकार हुन् । राणाको सेतो बाघ उपन्यास अंगे्रजी, जापानीसहित विभिन्न १२ भाषामा प्रकाशित भएको छ ।
वि.सं. १९७५ असार २१ गते पाल्पामा जन्मिएका राणा राजधानीको कुपण्डोलमा बस्दै आएका थिए । २००७ सालपछि राजनीतिमा समेत सक्रिय साहित्यकार राणा १०४ वर्षे राणा शासनविरुद्ध लेख्ने राणा परिवारकै प्रगतिशील साहित्यकार हुन् । राणाको पार्थिव शरीरलाई शनिबार दिउँसो श्रद्धाञ्जलीका लागि प्रज्ञा प्रतिष्ठानमा राखिने र अपराहृन पशुपति आर्यघाटमा अन्त्येष्टि गरिने भएको छ ।