
टाइम्स संवाददाता
बुटवल, फागुन २५ । राष्ट्रपति डा. रामवरण यादवले नेपालमा लोकतन्त्रको विकल्प नभएको बताएका छन् । उनले जनताको बलिदानबाट आएको लोकतन्त्र र संविधानसभाको विकल्प खोज्न नहुनेसमेत उल्लेख गरेका छन् ।
लुम्बिनी अञ्चल अस्पतालको शतवार्षिकी समारोह तथा नवनिर्मित शल्यक्रिया भवनको बुधबार बुटवलमा उद्घाटन गर्दै राष्ट्रपति यादवले लोकतन्त्र संसारमै सफल व्यवस्था रहेको बताए । देश समुन्नत बनाउनका लागि जनता सर्वोपरि रहने लोकतन्त्रबाहेक अर्को विकल्प हुनै नसक्ने उनको भनाइ थियो ।
राष्ट्रपति डा. यादवले लोकतान्त्रिक शासन व्यवस्थामै शिक्षा र स्वास्थ्यको विकास सम्भव भएको बताए । देश विकासका लागि शिक्षा र स्वास्थ्य क्षेत्रको विकास हुन जरुरी रहेको पनि उनले प्रष्ट पारे ।
दुई पटकसम्म प्राप्त भएको लोकतन्त्रलाई संस्थागत गर्न नसक्दा मुलुक पछाडि परेको बताउँदै राष्ट्रपति यावदले जनआन्दोलन ०६२/६३ बाट प्राप्त लोकतान्त्रिक गणतन्त्रलाई संस्थागत गर्न सबै शक्ति एकजुट हुनुपर्ने आवश्यकता औंल्याए । २०१७ सालमा प्राप्त लोकतन्त्रलाई नफालेको भए मुलुक अहिले धेरै अगाडि बढिसक्ने बताउँदै उनले जलभण्डारको देशका रूपमा चिनिने नेपालले आफ्ना जनतालाई स्वच्छ पिउने पानी, विद्युत् सेवासमेत दिन नसकेकोमा चिन्ता प्रकट गरे ।
उनले मुलुकको सार्वभौमसत्ता राष्ट्रिय अखण्डताको रक्षाका लागि सामुदायिक सद्भाव कायम गरेर अगाडि बढ्न जरुरी रहेको बताए । सबै राजनीतिक दललाई समेटेर अगाडि बढ्न आफूले प्रधानमन्त्रीलाई सुझाव दिइसकेको समेत जानकारी दिए ।
राष्ट्रपति यादवले चिकित्सकहरूलाई समाजले सम्मान दिएअनुरूपको सेवा प्रदान गर्न आग्रह गरे । उनले सय वर्षको गौरवमय इतिहास बोकेको अस्पतालबाट अबका दिनमा जनतालाई अझै स्तरीय सुविधा प्रदान गर्न सकोस् भन्ने शुभेच्छासमेत व्यक्त गरे ।
राणा प्रधानमन्त्री चन्द्रशमशेरको पालामा १९६७ साल फागुन १५ गते स्थापना भएको सो अस्पतालमा हाल एक सय ३५ शैøया रहेका छन् ।
राष्ट्रपति डा. यादवले बुधबारै बुटवलको हाटबजार लाइनमा रहेको सिद्धार्थ गौतम बुद्ध क्याम्पसको नवनिर्मित भवनकोे समेत उद्घाटन गरे । उद्घाटन कार्यक्रमलाई सम्बोधन गर्दै राष्ट्रपति यादवले शिक्षा र स्वास्थ्यलाई पाखा लगाएर कुनै पनि मुलुकको विकास हुन नसक्ने धारणा राखेका थिए ।
आफ्नो प्रतिक्रिया पठाउनुस्