
टाइम्स संवाददाता
काठमाडौं, फागुन २५ । बेलायतले नेपालको चौतर्फी विकासका लागि ३८ खर्ब ६० अर्ब ७८ करोड ४० लाख रुपैयाँ सहयोग प्रदान गर्ने भएको छ । शान्तिप्रक्रिया, सवल शासन, सुरक्षास्थितिमा सुधार तथा न्यायमा पहुँच बढाउन चार वर्षको अविधमा खर्च गर्ने गरी बेलायतले उक्त सहायता रकम उपलब्ध गराउने भएको हो ।
नेपालको भ्रमणमा रहेका बेलायती अन्तर्राष्ट्रिय विकास राज्यमन्त्री एलन डंकनले बुधबार उक्त सहयोगको घोषणा गर्दै आर्थिक वृद्धिबाट फाइदा लिन नसकेका गरिब तथा पिछडिएका वर्गको उत्थानलगायत कार्यक्रम कार्यान्वयनलाई चार वर्षे योजनाले प्राथमिकता दिएको बताए । सर्वसुलभ स्वास्थ्य तथा शिक्षा सेवा प्रवाहमा सघाउने, मौसम परिवर्तनका कारण पर्ने प्रभावको सामना, भूकम्पजस्ता दैवी बिपत्ती न्यूनीकरणका साथै महिला तथा बालबालिकाको जीवनस्तर उकास्ने कार्यमा सो रकम खर्च गरिने उनले जानकारी दिए ।
बेलायत सरकारले सञ्चालन गर्ने विकास योजनाले दुई लाख ३० हजार रोजगारीका अवसर सिर्जना गर्नुका साथै जलवायु परिवर्तनको जोखिमबाट ३० लाख नेपालीलाई जोगाउने जनाइएको छ । योजनाअन्तर्गत वनसँग सम्बन्धित कार्यक्रमबाट पाँच लाख ७० हजार जना गरिबीको दुश्चक्रबाट मुक्त हुने, एक लाख आठ हजार दुई सयलाई अवाञ्छित गर्भधारण गर्नबाट रोक्ने तथा एक लाख १० हजारले शौचालय सुविधा उपभोग गर्न पाउनेछन् ।
सन् २०११ देखि २०१५ सम्म कार्यान्वयन गरिने चार वर्षे विकास कार्यक्रम घोषणापछि आयोजित पत्रकार सम्मेलनमा राज्यमन्त्री डंकनले गरिबी घटाउन राजनीतिक स्थिरताका साथै सहमति प्रवद्र्धन हुनुपर्नेमा जोड दिए । बेलायतले नेपाललाई प्राथमिकता प्राप्त मुलुकको सूचीमा राखेको उल्लेख गर्दै उनले सहायता राशिमा ९१ प्रतिशतले वृद्धि भएको जानकारी दिए ।
यसअघि डंकनले प्रधानमन्त्री झलनाथ खनालसँग प्रधानमन्त्री कार्यालय सिंहदरबारमा भेट गरेका थिए । डंकनले भेटपछि पत्रकाहरूलाई बताएअनुसार नेपालको शान्तिप्रक्रिया, संविधान निर्माण र विकास निर्माणका लागि बेलायतले गर्नसक्ने सहयोगका बारेमा छलफल भएको थियो । उनले प्रधानमन्त्री खनालसँगको छलफल उपलब्धिपूर्ण भएको बताए ।
उनले अन्तर्राष्ट्रिय विकास सहयोगअन्तर्गत बेलायतले डिफिडमार्फत प्रदान गर्ने विकास सहयोगलाई दोब्बर गरिन लागिएको जानकारी दिँदै खासगरी नेपालको भूकम्पीय जोखिम न्यूनीकरणमा सहयोग रकम लगानी गरिने बताए ।
राज्यमन्त्री डंकनले बुधबारै नेपाली कांग्रेसका सभापति सुशील कोइरालासँग पनि भेटवार्ता गरेका थिए । कोइराला निवास महाराजगञ्जमा भएको भेटवार्तामा सभापति कोइरालाले नेपालमा नयाँ संविधान निर्माण र शान्तिप्रक्रिया सफलतापूर्वक टुंग्याउनेबारे कांग्रेसको धारणा अवगत गराएको बताइन्छ ।
आफ्नो प्रतिक्रिया पठाउनुस्